أخواني وأخواتي فالله
السلام عليكم ورحمة الله وبركاته
أقدم لكم هذي القصيده الألفيه وهي عباره عن تجربتي ومفهومي البسيط للحياه
ولكل حرف منها له حكايه والقصيده لها قصه ولكن يطول الشرح فيها
فأحببت أن أضع القصيده دون ذكر قصتها وأرجوا أن تنال إعجابكم
ألفٍ أبدي ذكر بيتي بربي *** بسم الله الرحمن ياذكر ربي
ياعالم سري وجهري ودربي *** ياغافرٍ ياواحدٍ فرد منان
والباء بنات الفكر قامت تخابط *** أبي أرتبها وقامت تشابط
إن قلت هادف وأيضا وإن قلت هابط *** ياكيف أجمعها معاني وقيفان
والتاء تحزم فكري يومي نخيته *** وقال بعني سوق وآنا شريته
أبشر بعزك وما طلبته لقيته *** أسخر الأبيات لجلك والأوزان
والثاء ثمار القاف ياعارفيني *** هذا الزمن قلته ياشينه يازيني
من الذي شاريه من بايعيني *** أخلف عقول ولا رجح له بميزان
والجيم جاني شي ماقد عرفته *** إلين خالطت البشر ثم عفته
عزالله إن الناس أجناس شفته *** بأصنافهم تاخذ تجارب وبرهان
والحاء حبُ قالها كل واحد *** أحد يهيم ابها وأحد دوم جاحد
وأحدٍ لعوب بين صادق وسارد *** والعالم الله صادق الحب مابان
والخاء خرجٍ عند ناسٍ مخبأ *** ياويل وإن جيته يثور ويشبأ
حقد وضغينه وزاد فوقه يهبأ *** ليته يضيع الخرج ولافيه عنوان
والدال درسٍ في حياتي تنوع *** هذا يحفزني وهذا يروع
في كل يومٍ تجربه لي تفوع *** كنها تقول العلم والا أنت صقهان
والذال ذل الدين في كل يومي *** في كل يومٍ ذل من ذاك يومي
دام اليهود تلعب علينا تحومي *** ولا فيه من يردع ولافيه شجعان
والرا راسٍ مايعرف المحنه *** بعض البشر وصفه ورمزه وفنه
يجيك متعالي وفضله يمنه *** ما كنه مخلوقٍ ولا كنه إنسان
والزاي زينة دنيتك مال وإعيال *** وأزيدها ثنتين ملزوم رجال
كرامتك سمعتك تفريطها امحال *** عز لحياتك ورحمةٍ بعد الأكفان
والسين سيف العلم يوصف بقوه *** وأيضا بذو حدين يامر حلوه
أما تعلم جهل وقل المروه *** وألا تعلم علم يخدم وله شان
والشين شانت دار الأجواد فيهم *** من يوم جاها الحسد وسلط عليهم
عقب المعزه وجمعةٍ تعتليهم *** أحتف عليها النذل نارٍ ودخان
والصاد صدق القول ما عاد يعرف *** ولاعاد صدق يقال والكذب يغرف
هذا التلكع والسوالف تحرف *** والصدق تشر بأصبعك كنه نيشان
والضاد ضربٍ للمثل عند شيبه *** عنده من أعلوم الزمن ما يحكيبه
حكمه وعبره والتجارب نصيبه *** ياطيب من يفهم وياخذ بشيبان
والطا طاش العقل مني وجني ***هذي عمايم عقلها زاغ كني
متمسكه فالجهل تبكي تغني *** متوليه بالطعن سنه وقرآن
والظا ظلام الليل مهنه ودراسه *** وعند بعض الناس حب وعساسه
ليله يسعسعبه نهاره نعاسه *** والقلب مختوم وصلاةٍ بنسيان
والعين عيني يوم شافت بتلفاز *** شعبٍ على جوعه وزاد المرض واز
وحنا على الخيرات نسرف ونجتاز *** مانعتبر دام العبر جات مجان
والغين غصت قلبي وأنا محمد *** الحاجة القشرا لنومي تبدد
كسرة ظهر لا صرت فيها مقيد *** دنيا العنا تعطيك من مرها ألوان
والفاء فيني فيض من غيض يحكي *** توني شبابٍ شفت من شاف يبكي
لو الجوارح تنطق اليوم تشكي *** وثم أبتدت بحكايتي سر وإعلان
والقاف قوه فالنزاعات موجود *** بين العرب تلقى دماءٍ وبارود
هذاك خاين وذاك يحشد له إجنود *** والله يعين إشعوب ضايع بالأوطان
والكاف كسبي في زماني بلمه *** أجوده وأشدد عليه ثم أضمه
أخواني أخواني عصاي ومعمه *** ولابتي مكسب إلى ذالزمن خان
واللام ليتك يازمن ترجع أشوي *** حيثي صغير وقلبي أصفى من المي
ماكنت شايل هم لا لا ولا شي *** لعب ومرح وإن زاد هوشات بزران
والميم منهجنا سلف واتباعه *** منهج وسط سنه وأهل الجماعه
منهج طريق الحق علم وقناعه *** ماهوب منهاجٍ نهج طعن وإلعان
والنون نون النسوة اللي يكيدون *** تغلب رجالٍ فالمراجل يعدون
من سلم اللحيه لها يبات مغبون *** حيث المره مثل الفرس ود وإعنان
والهاء هدية ربي اللي كتبها *** صحه وفراغه سعد منهو أحتسبها
حتى النبي وصى وقال أكتسبها ***ولا فات من عمرك ترى عمرها فان
والواو وافق للنشامى المشاكيل *** اللي على الرفقه تشيل الغرابيل
ومرافق الخمه تجيب البهاذيل *** بيعت رفيقٍ عندهم خس الأثمان
والياء يختم ذكر بيتي نبيه *** لمحمد الهادي صلاة وتحيه
بعداد موت الخلق وإعداد حيه *** وعد الحجر واعداد ماهل ودان
[/b
موضوع: تجارب وبرهان 
السبت مايو 23, 2009 5:58 am
